Pagina:Raccolta di poesie in dialetto veneziano 1845.djvu/456

Da Wikisource
Jump to navigation Jump to search
75%.svg
Sta pagina la xe stà trascrita, ma la gà ancora da vegner rileta.


LA LODOLETA


CANZONETA.



Oh che bel zorno!... Vardilo!
     Tuto seren xe el cielo:
     No gh'è una nuvola,
     No ghe xe un velo,
     5Che ghe fazza ombra al sol.
L'aria xe quieta placida
     Le fogie no se move;
     E fina zefiro
     Xe sconto... dove?
     10A la so Flora in sen.
Mile fioreti, e bocoli
     Spiega la nova erbeta:
     Fra lori limpida
     Seore l'acqueta,
     15Che imorbidisce el pra.
La lodoleta semplice
     S'alza, cantando, a svolo,
     Ohimè! che amabile!
     Senti che a solo!
     20Chi è che la sa imitar?
«Da la giogia, che me sgiozzola
     Qua sul cuor la vaga pompa
     Dei to ragi, caro sol,
     Sol sublime! me destemparo,
     25No gh'è gnente che te crompa,
     Tuto ti è, tuto ti pol.
Ti pol tuto, ti xe l'organo
     D'ogni ben, che godo al mondo:
     Ti è la mia felicità:
     30Se ti manchi, se un spernachio
     Te coverze, me confondo,
     Trista, aflita resto là.
Per ti solo me despigolo
     I graneti, per i campi
     35Svolazzando tuto el dì:
     La to luse è che dà l'anima,
     Sfavilandoghene i lampi,
     Sul so nido, ai mii pipì...»
Ringrazia el sol benefico

     40Cussì la lodoleta.
     Mi vado in estasi...
     Sieu benedeta!
     Ti, e chi te fa cantar!


L'ARCO CELESTE.


Tramonta el sol, e de fazzada intanto
     Un gentil vaporeto fa cascar
     Fina fina dal cielo una pioveta;
     E fra i so fili trasparisce i monti,
     5Che l'orizzonte a scala slonga, e sera.
     Peta, e se franze ne le giozze i ragi,
     E come sora un velo tuti sete
     Se depenze i colori de la luse.
     I se depenze in arco, e l'arco pusa
     10A dreta, e a zanca in cima de do vete,
     Dove se imbosca sempre verdi i pezzi.
     Per soto a l'arco, come soto a un ponte
     Se vede campi, prai, boscheti, coli,
     E un valon sbregà in fondo da un torente;
     15Ma perchè gnente manchi: a pie d'un monte,
     E a cavaloto d'un secondo, sponta
     Vago un paeseto, che fa scontro a l'arco
     Co 'l bianco, e el fumegà de le so case.
          De sta sorte de spetacoli
               20Dona a l'ochio la natura!
               Vegna qua chi la trascura:
               Se poi mai bramar de più?
          Vegna, e veda come supera
               I so semplici dileti,
               25In confronto dei bancheti,
               E dei bali de cità!
          Qua se gode, e no se tacola
               El candor de l'inocenza:
               Quel, che mostra l'aparenza,
               30La sostanza ve mantien.
          De natura vardè l'opere:
               Scrutinele tute quante:
               Fra le crode, fra le piante
               Vedè l'Ente Creator.
          35Fin le cosse, che par picole,
               Le xe grande portentose:
               Chi è, che sguarde fa le rose?
               Chi fa bianco el zensamin?

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Raccolta_di_poesie_in_dialetto_veneziano_1845.djvu/456&oldid=61416"