Pagina:Raccolta di poesie in dialetto veneziano 1845.djvu/284

Da Wikisource
Jump to navigation Jump to search
75%.svg
Sta pagina la xe stà trascrita, ma la gà ancora da vegner rileta.


     E benchè Amor sia un perfido
     No so scampar da Amor.
So.... ma el saver no medica
     Chi è nato per sentir;
     E so, che no scampandote
     Tropo avarò a sofrir;
So che in quel ochi, o Filide,
     Xe sconto el traditor;
     Nè so scampar da Filide,
     Nè so scampar da Amor.



LA GONDOLETA.


La biondina in gondoleta
     L'altra sera go menà,
     Dal piacer la povereta
     La s'à in bota indormenzà.
La dormiva su sto brazzo,
     Mi ogni tanto la svegiava,
     Ma la barca che ninava
     La tornava a indormenzar.
Gera in cielo mezza sconta,
     Fra le nuvole la luna
     Gera in calma la laguna,
     Gera el vento bonazzà.
Una sola bavesela
     Sventolava i so caveli,
     E faceva che dai veli
     Sconto el sen no fosse più.
Contemplando fisso fisso
     Le fatezze del mio ben,
     Quel viseto cussì slisso,
     Quela boca e quel bel sen;
Me sentiva drento in peto
     Una smania, un missiamento,
     Una spezie de contento
     Che no so come spiegar.
So stà un pezzo rispetando
     Quel bel sono, e ò soportà,
     Benchè Amor de quando in quando
     El m'avesse assae tentà;
E ò prova a butarme zozo
     Là con ela a pian pianin;
     Ma col fogo da vicin

     Chi avaria da riposar?
M'ò stufà po finalmente
     De sto tanto so dormir,
     E gh'ò fato da insolente,
     Ne m'ò avudo da pentir;
Perchè, oh Dio, che bele cosse
     Che gh'ò dito, e che gh'ò fato!
     No, mai più tanto beato
     Ai mii zorni no son sta.



EL TU E 'L VOI.


Nina, dov'è quei tempi
     Che in barca da tragheto,
     Su l'ora del frescheto
     4Se andava a scorsizzar?
Che sol de le to grazie,
     Del to bon far vestia,
     Ti davi gelosia
     8A qualche dea del mar?
Dov'è quei dì beati
     Che un marendin bastava,
     Che ambrosia el deventava
     12Solo da ti tocà?
Che in mezzo al to matezzo,
     Donandote a l'amante,
     Ti 'l favi in un istante
     16Felice ed inganà?
No ranghi, no tesori,
     Te dava alora el cielo,
     Ma el fresco, el bon, el belo,
     20E un cuor inzucarà;
E morbinosa l'anima,
     E ochieto biseghin,
     Sen d'alabastro fin
     24Sul torno lavorà.
Co tante grazie adesso,
     Fresca, matona e bela,
     Chi furba e baronzela
     28No aveva a deventar?
Ti 'l geri, o caro ogeto,
     E Amor, me lo perdona,

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Raccolta_di_poesie_in_dialetto_veneziano_1845.djvu/284&oldid=59363"