Pagina:Raccolta di poesie in dialetto veneziano 1845.djvu/221

Da Wikisource
Jump to navigation Jump to search
75%.svg
Sta pagina la xe stà trascrita, ma la gà ancora da vegner rileta.


     25Cigàndo in francese
     La scote 'l paese:
     «Ossò mes amì
     La ren et issi!»
     La lengua i la sa;
     30S'à tuti afolà.
El ramo d'un alboro
     Se afita un zechin;
     L'impresa de l'arzere
     L'à tolta Manfrin;
     35I oseli se schiera
     A miera coi miera
     Co i coli cussì,
     Che i par tanti I,
     Col beco impirà,
     40Co l'ochio incantà.
Vardandola atonito
     Diseva 'l paon:
     «Va al diavolo, invidia,
     Cedemo, Giunon!
     45Quei ochi? xe stele!
     Le pene? candele!
     Che sol? no, per di...
     Quel beco fa 'l dì...
     Quel zufo indorà
     50L'à Giove spuà!
— Fenice, de l'iride
     Sorela magior,
     Dì, quel che te sfiamega
     Xe 'l fogo, o color?»
     55Aplaude, fa eco
     Co tanto de beco,
     Col falelolì,
     Col ciricicì,
     Oseli de qua,
     60Oseli de là;
Ma quando po in musica
     Soave, gentil,
     La modula un: grazie
     La par un april!
     65El russignol stesso
     «Ah! (dise) 'l confesso,
     Son vinto! sentì
     Che trilo in bomì!
     Che bel elafà
     70Son proprio copà!
— Belezza adorabile,
     Celeste virtù,

     Va là che ti meriti
     De no morir più!»
     75I osei ciga in fola,
     Co tanto de gola:
     «Che morte? mentì...
     La torna pipì
     Sul rogo impizzà,
     80Le celeghe 'l sa!»
Ma in mezzo a sto aplauso
     Che xe general,
     Sospira la tortora,
     Ingenua, leal.
     85Se acorze, e smanioso
     Ghe dise 'l so sposo:
     «Ti susti, bibì?
     La invidistu, dì?
     Perchè stastu là
     90Col beco cascà?»
Risponde al rimprovero
     La tortora: «oibò!
     Pensava che... (viscere...
     Invidia? mi no)
     95Che de la so razza
     L'è sola, gramazza!
     Che almanco po mi
     So sempre co ti!...
     No minga per... ma...
     100No fala pecà?»
Quel merito in isola
     Che spesso invidiè,
     Ve cava le lagreme,
     Se lo esaminè.
     105Tra i beni gh'è quei
     Ch'è megio, fradei,
     Averli a demì.
     No so se capì
     El gusto che ga
     110Chi gode a metà.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Raccolta_di_poesie_in_dialetto_veneziano_1845.djvu/221&oldid=59250"