Pagina:Pronostici e versi di Camillo Nalin 3.djvu/26

Da Wikisource
Jump to navigation Jump to search
100 percent.svg
Sta pagina la xe stà trascrita e rileta.


     Se inzenochia davanti,
     E là dei so pecai, che i gera tanti,
     Stando soto un'oreta
     20El svoda la sacheta.
     Terminando col dirghe al sacerdote
     — Son vegnù a confessarme,
     Perchè avendo trovà una bona dote
     Go deciso doman de maridarme —
25Don Ilario distrato,
     Che no gaveva fato
     Colazion,
     E gera za sonada ultima messa,
     Ghe dà l'assoluzion
     30Più che de pressa,
     E l'amen, recitando, o cussì sia,
     El ze per andar via.
Bastian che se ne acorze
     Dai busi favorio de la portela,
     35Fora la testa el sporze
     Disendoghe — la scusa cara ela,
     Vedendola a partir,
     Per scrupolo deciso de conscienza
     Mi la devo avertir,
     40La s'à desmentegà la penitenza,
     La qual me pararia
     Che in giusta proporzion dei mii pecai
     Esser la dovaria
     Granda che mai. —