Sora del conto mio quel che i vol lori,
No ghe ze stà mumento
Sin da la prima età
Che no gabia cercà
De star in esercizio col talento,
E aprofitar dei doni
Che a pochi la concede,
Rason apunto per la qual se vede
Da per tuti i cantoni
Un numero infinito de meloni,
Una strage de classici somari
Che no à passà le scuole elementari,
E che fra le manteche e i bergamoti
I spuzza che i revela da dindioti.
Quando po che coi ani so andà avanti
No ò fato come tanti
Che lassa in t'un canton
Virgilio, Ovidio, Orazio e Ciceron,
E apena se dileta
Qualche ora brusada
De darghe una passada
A la gazzeta,
Ma a studiar me so messo note e dì
Co le man e coi pì
Per far che 'l nome mio
No resta nel'oblio,
Meta, che, a dirla senza ostentazion,
Go la sodisfazion
