Pagina:Poeti antichi del dialetto veneziano 1.djvu/36

Da Wikisource
Jump to navigation Jump to search
100 percent.svg
Sta pagina la xe stà trascrita e rileta.



51O se no se' de vogia, o se se' strachi
     Andè qua in t'un trato al Magazen;
     E chiucheghene cinque o sie bardachi;
     Mi ghe n'ò, a dirve 'l vero, un bocal pien
     In cao, ch'el no m'à tocao i mustachi,
     E pì che prima de chiuchiar me vien;
     El chiaro in corpo mete forza e cuor,
     Vegnì su, Gnati, se me portè amor.

52— Ah gali, ah gali, ghe respuose Taco;
     No ve partì, sier Murga, aspetè un giozzo
     Che ghe ne chiuchierè 'n altro bardaco
     Che no ghe sarà drento aqua de pozzo.
     Ti ti à sempre de cianze pien el saco;
     Dal bogia esser me possa el naso mozzo
     Se un solo Castelan no à più busìe
     Ch' in tuti i Zaghi no ghe xe magìe.

53Su per balconi, fondamente, altane,
     Se se rideva no ve digo gnente.
     A veder ghe xe sempre certe lane,
     Nobili e altri che sta a dar la mente.
     Un tal avrìa la boca un par de spane;
     In questo salta su un Gnato valente
     Digando: A ti, sier Murga, sier fradelo,
     Femo una bota ti e mi, presto e belo.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poeti_antichi_del_dialetto_veneziano_1.djvu/36&oldid=64064"