Sora un ponte, de note
No se sente sigar1 quel da i giornai,
gnanca quel da i biscoti o da i cerini,
gnanca quelo che vende i bicerini,
piati, terine, calici e bocai;
roba che dura e no se rompe mai,
zugatoli de stagno e soldadini;
no se sente sigar gnanca i putini,
che i vol la bala, el sercolo, el tranvai.
Tuto tase! Ma l'Adese el camina
drio le so rive sempre sbisegando,
fin che l'aria se fa più fresca e fina;
e intanto che i fanai drento i se specia,
come 'na vosse che te va parlando,
el par che 'l porta le rosarie in recia.
- ↑ sigar: ― gridare.
