MANI DI NINA
Se al mondo quele man ghe fusse stae
Alora che l'umana perfezion
Gera l'ogeto de l'adorazion,
Deità le saría certo deventae.
Con quanto zelo mi avaría impiegae
Se me fosse trovà in quel'ocasion,
Sacerdote per vera vocazion,
In sto culto la note, e le zornae.
Ma cossa serve che mi vogia andar
Cercando el tempo de l'idolatría,
Perchè un culto a ste man s'abia da far,
Se invece alora le ghe perdería,
Facendose d'Amor ancuo adorar,
Co' adorae dai mortali le saría.
