Pagina:Poesie e satire di Pietro Buratti veneziano.pdf/3

Da Wikisource
Salta a ła navigasion Salta a ła riserca
Sta pagina la xe stà trascrita, ma la gà ancora da vegner rileta.

(NOVELLA) Sborio Conzaor de Pote.

Gran fiabe che ne mola sti Poeti
     Co volendo lodarne la Campagna
     I depenze inocenza sui fioreti
     Che chiapa i freschi de virtù compagna!
     No i conosse sto mondo, povereti,
     E no i sà che del vizio la magagna
     Da' fora tra la spuzza dei Casoni
     Come in mezzo ai più richi Palazzoni.
Tirsi che và sunando col cestelo
     Per la Morosa i fiori de Zardin
     Xe' un birbo che o se furega l'oselo
     O fote le so Piegore a passin;
     Cloe che lava nel fiume el paneselo
     D'acordo col Piovan fa' beco Elpin;
     Menalca masserioto xè un birbon
     Che buzzera per massima el Paron.
E tute le Piture lusinghiere
     Che de l'Arcadia el Sanazzaro à fato
     Sora logo le xe' tali cagnere
     Che bisogna per Dio darghe del mato:
     Come aponto in Teatro ve par vere
     Le scene che d'un Bosco sia el ritrato,
     Ma se pò tra le quinte amor ve mena
     No vedè che spegazzi da dosena.
E per darve una prova abiè pazienza
     (Zà che semo racolti a sto foglieto
     Sempre fra nù de buzzere semenza)
     De sentirve a contar un bel caseto
     Fatal de do sorele a l'inocenza
     In trapola chiapae per man d'un dreto
     D'un dreto Zavatin che per amor
     S'à fato de le Pote Conzaor.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poesie_e_satire_di_Pietro_Buratti_veneziano.pdf/3&oldid=58160"