Pagina:Pascolato - Versi Veneziani, Milano, 1928.pdf/18

VIII SETTEMBRE MCMX

(Per la prima rivista naval de la Terza Italia in Adriatico).

O

mar dei nostri vechi, femo festa!

     Ti sbatevi da secoli la riva
     Stufo de glorie morte: ben xe questa
                                                  Se Dio vol, forza viva!

Se ti ga ancora un feral de galìa
     Zo in fondi, un toco de caena rota,
     Ah, scometo che i vien dessoravia
                                                  Per vedarla, sta flota!

No ’l xe che un zogo: sti tosi fa finta
     De difenderse adesso o de assaltar;
     Ma i sarà boni un dì de bater grinta
                                                  Per le to acque, o mar.

No ’l xe che un zogo: ma da ani e ani
     No ti portavi un cargo cussì grando,
     O vechio mar, che Venier e Pisani
                                                  Passava trionfando.

Ti che ti te ricordi el Bucintoro
     Co el Doxe te vegniva a dar la vera
     In pompa magna de drapi e de oro,
                                                  Varda ste nave, e spera!

No xe Venezia sola, che fortuna
     E vita e gloria te confida, o mar:
     Xe ancuo l'Armada de l'Italia una
                                             Che te vien a sposar!