Par proprio d'impossibile
Che do avocati gabia
Sfogada la soa rabia
Sfidandose a duelo
No co' 'na ciacerada
Ma invece co' la spada.
Per una question ridicola
Perdendo el so decoro
I gà lassà del foro
L'antica e sicurissima
De lori nota usanza
Vulgo risparmiar la pansa.
Perchè de l'imancabile
Facil vostra eloquenza
Voludo avè far senza?
Gaveù forse paura
Trovarve nel pericolo
D'incorer nel ridicolo.
Del vostro bel proceder,
Che a dirla in confession,
In simile question
Motivo no ghe gera
Ne ombra pur de velo
Per baterse in duelo.
Credelo a mi chiarissimi
Co spada e co' pistola
Se tira e no se mola,
Dunque no la xe arma
Che a vualtri fassa vogia
Dov'e la scapatoja.
Per vualtri xa imancabile
Arma de profession
Che co' un sol ziron
Senza de comprometerve
Co' debita eloquenza
Tirè la conseguenza!
Tolè la pena e a scriver
Meteve a più non posso
Scrivè perfin de rosso
Ma vedarè sicuro
Per vualtri un risultato
Megio del duelo fato.
