Gloria in excelsis Deo
Sigar co' mi convien....
Orale no pro eo....
Sta musica no tien
Ancùo ch'el socialismo
S'avanza de gran passo
E che l'assolutismo
Comincia andar a basso,
Che tanti filantropici
Zira per tuto el mondo
E i passa fin i tropici
Sol per vegnirghe al fondo;
Penso al beato tempo
Quando sarò paron
E senza contratempo
Farò la colazion,
Penso de megio ancora
Quando saremo tuti
Fradeli sì dasseno
Tanto se beli o bruti
E che sia el mio ch'el tuo
Scambiar nù podaremo,
Quanta beatitudine
Al certo gustaremo!
Quando la comunanza
Dei fioi, de le muger
Sarà una costumanza
Che ne farà piaser.
Quando abolìo l'esercito,
L'impiego, la giustizia
Tuto andarà benissimo
No ghe sarà nequizia,
Quando richezze e onori
Sarà fra nu divisi,
Che spunterà la gioja
In tuti quanti i visi;
Alora de gridar
Evviva el socialismo,
Me sentirè infamar
El bruto assolutismo.
Gloria in Excelsis Deo,
No più l'assolutismo
Segnà mi go col deo
Che vogio el socialismo.
