3) De sta gran Piazza che da tanti ani
Go tignúo viva cola scena mia,
Per che razza de colpe e de malani
Succede adesso che i me cazza via?
4) Ecome qua, come un rondon novelo
Da qualche berechin cavà dal nio;
Son quà mortificà, come un agnelo
A so mare robá, povaro fio!
5) Se difender el giusto da ogni intrigo
Toca a Ela, Celenza mio paron,
Perchè me tol' li el mio possesso antigo
Senza stride1 a Palazzo o citazion?
6) Forse a quei tanti che le mie legnáe
Ga abudo, el gusto se vol dar cussì
De sto trionfo, che xe poco assae?
O un esempio i vol dar sora de mi?
7) Forse perchè bufon, i me vol fora?
La perdona, paron, se parlo franco;
Ma se i vol via tuti i bufoni, alora
Va in bando un terzo de Venezia almanco.
