A una
Sepolta sotovia de un capelon,
co 'na gabana longa, impelissada,
te go incontrà l'altra matina in strada
e ti m'à fato proprio compassion.
Quela roba, lo so, te l'à comprada
a un tanto al mese el povaro mincion
de to marìo; ma roba da bonton
no ghe sta ben a chi fa la zornada.
Manco sempiäe, vecia, manco creste,
manco strighessi e più disabiliè
su quel capelo e sora a le to veste!
Scolta 'l mio bon consegio e daghe reta:
Xe megio assae parer quel che se xe,
ma aver de soto la camisa neta.
