Una bela Data
Tuta a parole d'oro e tempestada
de smeraldi, rubini e de brilanti,
sul libro de la storia xe incastrada
'na Data che 'l dispeto xe de tanti.
L'è un XX de Setembre, 'na zornada
che xe scolpia sul cuor de tuti quanti
e che vol dir: la morte decretada
de un impero che tropo xe andà avanti.
E ben ga fato 'l nostro bon Governo
a decretar che 'na zornada tal
gabia da essar festa nazional,
basta che col sistema ormai eterno
de sgnacarne ogni tanto tasse e spese,
no l'abolissa el primo dì del mese.
