A le tose
par el bòcolo de San Marco
Ancuo che la mia vena morbinosa
verso de vualtre come 'l vento svola,
lassè che 'na domanda sola sola
ve possa far co forma rispetosa:
Gaveu più caro un bòcolo, 'na rosa,
do gelsomini, 'na modesta viola,
o invece preferiu qualche parola,
'na paroleta tenara, amorosa?
Tasè? no rispondè? forse vol dir
che ve sarave caro insieme al fior
un complimento scaturio dal cuor?
E se sto fior mi no podesse ofrir
nè parole d'amor, faressi caso
se ve mandasse a pizzegheti un baso?
