Pòvara umanità
Gera de note; un fredo busaron
fasseva sgambettar tuta la zente;
un'aria fina, seca impertinente
riduseva el mio naso in pevaron.
Brichet Monssù? — Sta vose da inoçente
me toca 'l cuor col debole so son;
me volto, torno indrio e, in t'un canton,
vestio de strasse, par no dir de gnente,
dal fredo incancarìo e ranicià
vedo un bambin; ghe vardo arente e lu:
dôe scatole tre sold, brichet Monssù?
― Xestu ti solo? ― Sì ― Ma... e to papà?
― Papà l'e 'ndait a l'ostô... E gera tardi,
oh genitori infami, oh che bastardi!
