Lege de compenso
Vien zo la neve a fiochi bianchi e bei
sora le case i campi e le calete,
co gran divertimento dei putei
che se la spàpola col far balete,
Chi xe che stà più mal, xe i pori osei
che stenta a becolar le fregolete;
e ancora più se lagna tuti quei
che ga le scarpe, oh Dio!, che fa baossete.
Lagnarse! ma parchè? Se ghe xe tanti
costreti a sgobassar, vogia o no vogia
se i vol che a casa la pignata bogia,
no gh'è, in compenso, st'altri, e chissà quanti,
che co la neve trova un motiveto
per snanararse tuto el zorno in leto?
