Pagina:Levi - Versi in dialetto triestino.djvu/19

Da Wikisource
Sta pagina la xe stà trascrita, ma la gà ancora da vegner rileta.
El mio putel


     Benedeto putel, ogni matina
Ale zinque el se meti el sveiarin,
E fin le sete e meza el te mulina
Senza stancarse mai, grego e latin.

     Po el va al ginasio; nol ga un gran talento
Ma el ga amor proprio e volontà de fero,
Ghe voio ben per questo e son contento
E, no lo nego, de quel fio mi spero.

     Studia, studia bambin, sempre ghe digo,
Che el pan no manca a chi che ga studià,
Se no, te parlo ciaro, xe caligo,
Guai se te resti un mus come papà.

     Mia moglie alora: — Dio, quel povareto
Ti lo tormenti de matina a sera,
No ti vedi che el studia, benedeto!
El me par magro, palido de cera.

     Mi rido e ghe ripeto al mio putel:
Studia, e tua mama lassa che la canti,
Più sai che ti te meti nel zervel,
Più a sto mondo, fio mio, ti andarà avanti.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Levi_-_Versi_in_dialetto_triestino.djvu/19&oldid=69284"