XXIX.
S'anca no go nè onori ne richeze,
Mai no me lagnarò del mio destin.
Perle xe i so bei oci, oro le drezze,
e un scrigneto de zogie el so bochin.
Oh che dolçe, che santa poesia,
Vivar unito co' la dona mia!
Co' la mia dona, co 'l mio bel tesoro,
Che ga in boca le zogie e in testa l'oro.
XXX.
Co sarò morto, fa come Didone,
Che de Sicheo s'à presto consolà.
L'amor xe vita per le bele done,
E un Enea più fedel ti trovarà.
Godi, godi, Teresa, el novo amor
E la memoria mia scassa da 'l cuor.
El mondo va cussì: chi more lassa,
E quei che vive presto se la passa.
