Questo xe gnente! Go petà de più
Una squadra de vescovi, de queli
Che faria danar l'anema a Gesù
E gò dito in francese ― Alon, fradeli,
Oeil a la plume e qui s'è vu, s'è vu!
Che oci! Lustri che i parea corteli!
Viva l'Italia! Questo xe el paese!
Questo xe el Paradiso e la cucagna,
Semenà de conventi e pien de chiese,
Indove i preti gode e i frati magna!
El Governo xe bon e xe cortese.
Comandèmo in cità come in campagna,
El nostro Pantolon paga le spese
E i ne còcola qua megio che in Spagna.
L'eredità le piove ogni momento,
I Gesuiti insegna e nei colegi
I ga i putei de mezo Parlamento.
Passa i ministri e resta i privilegi,
E i liberai me fa tanto spavento
Che iscartozzo el rapè ne le so legi!
E adesso i pensa ― e mi ghe supio soto ―
Furbi! de dar el voto anca a le done,
L'unico seso ancora un fià devoto
E che crede a le strighe e a le Madone!
