Ah, i gà fischià in Alban, sti giacubini?
Ah, i gà fischià, polpete buzardone?
E alora a Roma gnente pelegrini,
Gnente mercà de Santi e de corone,
Gnente messe pei Padri Capuzzini,
Gnente bezi a chi tràfica in Madone!
No xela giusta? Chi la fa l'aspeta,
E po' che noi me rompa el tamburlan
Co la scusa de dir che per Alban
Castigo Roma co la mia vendeta.
I xe tutti una razza maledeta,
L'Albanese xe istesso del Roman..
Cossa diselo? I resta senza pan?
E a mi cossa m'importelo, ostregheta?
Co' gò vogia de pan e de’salame
Mi no fischio nissun, mi no importuno.
Che i fazza come mi, plebàgia infame!
Co' no gò vogia de magnar, dezuno.
Che i dezuna ancha lori e se i gà fame
E ben, che i vada da Giordano Bruno.
Giordano Bruno! Ah, quei gera tempi!
Quela la gera una gran bela età
Che i rispetava Dio, So Santità,
I beni de la Chiesa e i Sagri Tempi!
