Xe vegnuo dopo el cogo, el zambelan,
El nònzolo, el postier che i m'ha pelà
Co la stocada de la bona man.
Che bele usanze, ciò! Sia budelà,
Che ghe piopo un non expedit, che piopo,
Giusto de quei de prima qualità!
Ostregheta! Sul stomego gò un gropo,
Una smania ingossàda da fifar.
Povaro Bepi, chè deboto schiopo!
Xela una vita questa? I me fa star
Co le còtole bianche e col zucheto
In piè, fino a la sera a ciacolar.
«Reverisso! Bon ano! El mio respèto!»
E intanto i me tien quà come in galera...
Vedelo? I m'ha tagià fino el zufeto!
Libertà, libertà santa e sincera,
Lontan da Roma e da Mery del Val,
Perchè non posso vegnir via stasera?
Me recordo la note de Natal
Che Venezia era tuta in alegria
E le gondole in calca zo in canal
E le done coreva in Pescaria
Drento un fumo de fritole bogienti
Da desmissiar un omo in agonia.
Tuti i rideva libari e contenti
E sora i ponti e zo per le calete
Passava i cantarini co i stromenti.
Se sentiva un trilar de canzonete.
Un odor de naranze e buzolai
Squasi da far pecà d'esser un prete.
Pagina:Le Ciàcole de Bepi, Roma 1908.pdf/82
![](http://upload.wikimedia.org/wikipedia/commons/thumb/8/88/Le_Ci%C3%A0cole_de_Bepi%2C_Roma_1908.pdf/page82-664px-Le_Ci%C3%A0cole_de_Bepi%2C_Roma_1908.pdf.jpg)