Pagina:Le Ciàcole de Bepi, Roma 1908.pdf/41

Da Wikisource
Sta pagina la xe stà trascrita, ma la gà ancora da vegner rileta.


Cossa vùstu da mi, povaro vecio,
          Cossa vùstu da mi?

Gàstu, come el Signor, roto la piera
          De la tomba lontana

Per vegnirme a veder fin da Caprera,
          O vinto de Mentana?

Vinto? El vinto son mi che son qua drento,
          Povaro carcerà,

E vardo suspirando el monumento
          Segno de libertà!

La libertà! Quanto ti gà soferto
          Per farla trionfar!

Ti gà sfidà la morte a viso averto,
          El ciel, la tera, el mar.

E mi, quando i todeschi comandava
          Sovra el nostro teren,

Caro vecio da Dio, mi t'aspettava
          E te voleva ben!

La libertà! La gò credesta fola
          Da trapolar la zente,

Emblema framasonico, parola
          Che dise poco o gnente,

Ma adesso? Ah, come giudico diverso
          E come son pentìo!

L'omo conosse el ben co' lo gà perso,
          Chę nol torna più indrìo!...

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Le_Ciàcole_de_Bepi,_Roma_1908.pdf/41&oldid=74828"