Pagina:Le Ciàcole de Bepi, Roma 1908.pdf/138

ALBE BARBARE.

Super flumina Babylonis illic sedimus et flevimus.

Psal. CXXXVI, 1.

CIÀRO, ne l'ombra fresca dei sàlesi,
pien de branchèti voganti d'anare,
recordo el Muson, el mio fiume,
ne la luse de l'alba serena

     co l'acqua lustra sbrissava limpida
tra i fili brevi de l'erba tenera
che se abandonava tremando
a la volutà del primo baso.

     L'odor de i campi fumava tepido
e un mato volo de alegre passare
cigava su i novi pagiàri,
imbriaghe de amor e de luze.

     I manzi bianchi calava liberi
fin zò nel fiume da i grassi pascoli
e 'l cuco, lontan tra le frasche,
mincionava la zente cantando.