Pagina:La vera felicità.djvu/25

Da Wikisource
Sta pagina la xe stà trascrita, ma la gà ancora da vegner rileta.
SONETO
Nel quale parla Bepi, e Aneta fradei dela sposa.


A. Bepi, cossa gaveu per carità!
     Me par che siè de mala vogia assae;
     Andè tirando certe sospirae.
     Che no me piase gnente in verità.

B. Cara Aneta, caveve per pietà!
     No go vogia, credelo, de secae:
     Co vedè le creature desgustae,
     Ve consegio lassarle in libertà.

A. Che desgusti gaveu?.. Sì, la sorela
     Ne lassa ancuò: ma dove vala po?
     A trovar la fortuua la più bela.

E quantunque l’adora, ve dirò,
     Che posto che la sposa el bon Titela,
     Invece de lagnarme riderò.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:La_vera_felicità.djvu/25&oldid=55479"