Ò d’esser impiantada da Costù?
O Romano del diavolo, sta volta
Ti t’à mal intrigà.
Luc. Son quà col specchio.
Lug. Prende la bauta dalle mani di Tonin, e gli da a tenere lo specchio.
Deme qua, tegnì saldo; tegnì dreto.
Dov’è el frontin? a Lucieta.
Luc. Ecolo quà.
Lug. Si mette la bauta e si guarda allo specchio che Tonin tiene in mano.
Tegnì.
Tegnì dreto, sior Aseno, cussì.
Tremeu le man? a Tonin.
Ton. Go un fredo malegnazo,
Se la lassava, che zogasse un poco
Me saria za scaldà.
Lug. Puh! Panpalugo!
Dè qua. Tegnilo, vù, Lucieta.
Luc. Vegno.
Ton. (No vedo l’ora de vegnir più grando.
Co’ vegno fora de Colegio, subito
Me vogio trovar subito una bela
Signora da servir! Ma minga un diavolo
Come Sior-Amia. Zogaremo insieme
A la bala, al volante, a le manatole:
Anderemo al Casoto del Borgogna!
Oh me voi divertir! Nò vedo l’ora!)
da se.
Lug. Coss’andeu tambascando tra de vù,
Sior stolido?
Ton. Mi? gnente.
