Ma quanto afana mai la mente avara
Quela custodia! O quante note mai
El pensier ve fà guera! ò quanti guai
40Al cuor ingordo avidità prepara!
O quante v’intra in peto ansie, e paure,
Che quel, che possedè tolto ve sia!
v’intra le difidenze in fantasia;
44Nè mai le vostre porte è ben segure.
E certo havè rason de no’ fidarve:
Perche mai no’ n’havè chi ben ve vogia.
Prega ogn’un che dal Mondo el Ciel ve togia.
48Cerca ogni man cortel, per scortegarve.
Sè in odio al Mondo, e al Cielo; e fe pur conto,
Che ogn’un voria suzzarve ogni meola,
O trarve oro colà zò per la gola,
52Co fè i Parti a l’empio Crasso aponto.
Sarà chi vogia dir che la raise
L’Avariza no’ sia de tuti i mali?
Avrì le rechie, ò miseri mortali;
56Le sacre boche, e le profane el dise.
