DE L’AVARIZIA.
O Dio! no’ posso più. Forz’è che parla.
Son provocà. Bisogna che me buta.
Piu no’ posso tegner la lengua muta.
4Sta bile alfin bisogna svaporarla.
Adesso son in colora con tuti.
Daria (co’ se suol dir) de i pugni in Cielo:
Perche butà me vien la broa sul pelo,
8Contra le leze, i Canoni, e i statuti.
Hò recevudo un dono in sù la borsa.
O Dio, da chi! Bisogna, à mio despeto,
Ocultar de l’ofesa anca el sugeto,
12Dove la grinta mia quasi è trascorsa.
Questo è quel, che me diol, ch’anca i boconi,
A crepa cuor, bisogna strangolarli.
O d’Avarizia velenosi tarli,
16Drezzar contra de vu vogio i bolzoni.
