1.
1451. Die 14 Februarij (M. V.)
Sec. Sen. T. 19. Fol. 122. recto.Contulit se ad nostram presentiam, unus orator Serenissimi domini Imperatoris Constantinopolis, quod explicavit nostro dominio, apparatus qui fiunt per imperatorem turchorum, tam exercitus maximi terrestris, quam etiam classis maritime, ut se conferrat ad expugnationem civitatis Constantinopolis, que non est dubium, nisi provideatur de favore et presidio, magno periculo submissa est, petiitque propterea cum multa instantia, favores et subvenctiones nostras, pro honore dei, salute et conservatione civitatis prefate etc. sicut relatum est isti Consilio per Serenissimum dominum Ducem. Vadit pars, quod respondeatur eidem oratori:
Quod profecto, displicenti animo, audimus, quod aliquid adversi tentari queratur per teucrum contra ipsum Serenissimum Imperatorem, et urbem illam suam, tam pro honore dei, et christiane religionis, quam respectu affectionis, quam gerimus imperatorie Maiestati. Et quum idem orator, sicut nobis retulit, iturus est Florentiam, et successive Romam ad Summum Pontificem, et ad alias potentias Italie, dicimus, quod laudamus plurimum hunc accessum suum, ut impetiare possit favores ipsarum potentiarum, quum quanto majores erunt, tanto melius, tantoque utilius erit. Et quum etiam petit favores nostros, respondemus, quod sicut bene intelligi posset, res nostre, multe restricte sunt in his partibus Lombardie, ita ut difficilimum nobis sit, complacere domino suo, sed tamen, tum orator ipse ad nos rediturus sit, dicimus, quod tunc etiam erit nobiscum, intelligeturque, quid facere volent alie potentie Italie, et nos etiam declaramus sibi, quod juxta conditiones rerum et temporum occurrentium reperiemur prompti, et optima mente dispositi ad ea, que per nos honeste et convenienter fieri poterunt.
Circa partem salnitrii, et coraciarum, quas petiit prefatus orator, respondeatur sibi, quod contenti sumus complacere eidem Serenissimo Imperatori, de quantitate quam postulavit.
Et ex nunc captum sit: quod salnitrium ipsum, et coratie emantur, et mittantur ad manus baiuli nostri Constantinopolis, simul cum literis cambij, costi dicti salnitrij et coratiarum cum ordine, quod solutis per imperatorem dictis literis cambij, baiulus noster sibi dari faciat predictum salnitrium et coratias.
| De parte | 111. |
| De non | 2. |
| Non sincere | 1. |
