bombarde verso a quele fuste; fra queli de Costantinopoli, e de le nave, e de le galie, tuti unidi, in una bota i disserò più de setanta bombardele, ma per la mala ventura, nissuna de quele non dè in niuna fusta de quele, e queste fuste de turchi, vedando questo tanto bombardar, se deliberò, e andò verso la sua armada, che iera sorta a le colone, e lì referì al suo capetanio quelo che i vete de la nostra armada, e stete da può i turchi con grando spavento de nui da mar. Per questo zorno non seguì altro da mar, da tera bombarde assai, e fo ancora uno puoco de scaramuza, ma gnente non fo da conto, salvo che tuti de la tera si steva cun gran spavento, aspetando de zorno in zorno la bataia zeneral, per la qual bataia veramente tuti se dà ad intender de esser schiavi del turco, come per esperienza è stado.
A dì diexedotto pur de questo mexe de mazo de note, turchi fabricò uno beletisimo bastion per el muodo come qua de soto intenderè a che muodo che il fexe questa note. Questi turchi, tuta questa note se messe a lavorar con una gran moltitudine de turchi, e fabricò in questa medema note uno bastion, il qual si era a oro1 di fossi, e vignia a soperchiar le mure di barbacani, e iera questo bastion per mezo uno luogo chiamado la Cresca. Questo bastion si iera sì fatamente fato, che non iera homo, (che) el podesse creder al muodo el iera conditionado, e mai da mò pagan non fexe si fata cosa, e sì bel artifitio. Ancora digo, si tuti li cristiani de Costantinopoli, avesse voiudo far sì fatta cossa, non l'averia posudo far in un mexe, e costui el fexe in una sola note. Questo notabile bastion si iera passa diexe luntan da le mure maistre de la tera, e suxo queste mure ne convegnia star asai zente armada per dubito de questo bastion, e perchè diga che el fose fato in una note, ma ve digo, che el fo fato in manco de ore quatro; il fexe sì tosto, che queli de le mure, che vardava quela posta non se ne potè acorzer de questo fabricar, salvo che la matina il vete fato, et ave una granda paura de sì fatta cossa, e visto, examinado questo mirabel inzegno, subito i andò a dirlo al serenissimo imperador, come s'era fabricà questa cossa. Subito l'imperador si se mosse con tuta la sua baronia, e vene a veder questa mirabel cossa, e quando i l'ave visto, tuti si romaxe come morti, dubitando de paura, sì come con efeto intravene, che sempre i dubitava che questo bastion non fosse caxon de far perdere la tera per soperchiar2 i barbacani. —
