Sta pagina la xe stà trascrita, ma la gà ancora da vegner rileta.
XXVIII.
LA QUARELA
(IN PRETURA)
― «Vu se'?» ― «Pin'Gnese» ― «Vostro pare» «Checo.»
― «La xe la querelante?» ― «Sissignor!»
― «Ben, sentève, e contèmela...» ― «Sior, eco:
Quel bel bochin me gà tocà l'onor...»
― «(Busierona)» ― «Tasè!» ― «Mugèr d'un beco,
La me gà dito, e no ghe so, mi, sior!
Piutosto, sàlo, magnaria, pan seco...»
― «Sentiu?» ― «(No la ghe creda, sior Pretor!)»
― «Da i vostri preçedenti quà risulta
Che la lengua gavè massa longheta,
E ve condano a lire sei di multa.»
― «Sie franchi a mi, per quela scoassera?
Mi me pelo...» ― «Pelève!» ― «Si, ostregheta,
Se credesse impegnar anca... la vera!»