XXIV.
ZOGO DEI BUSSOLOTI
― «Signori, atenti che in - t'un bater d'ocio
Ghe faremo sparir ste do balete
Al segretario. Dunque... (a l'erta, socio)!
Stè indriò, putei; putele, zo, ste quiete!
Per virtù de Barlich de le burlete...
Una, do, e tre... le xe sparie.» (Batocio,
Ma come fàlo)?» - «Gastu perso l'ocio?
No ti vedi che in sen el se le mete)?...»
― «E adesso, indove le andarò a trovar,
Se el segretario el me le gà magnae?
Atenti, vogio fàrghele spuar...
Spenzi, uno; spenzi, do: sto berechin,
No' le gaveva in mazaghen ficae?»
— «(O Dio! gò perso...» ― «Cossa?» ― «El tacuin?)»
