XVI.
INSOGNO E CABOLA
«Senti, ciò Zanze, senti sto insogneto
Che gò fato stanote.» - « Conta suso.»
― «Me gera destirada sora el leto
Co zo i cavei e col niziol sul muso;
E vèdar me pareva un bel sorzeto
Che fora e drento andasse per el buso
De la ciave.» «Nonanta.» ― «Mi lo meto!»
― «El te vien fora drito come un fuso.
E po?» ― «Ma senti, ciò, che insogno strambo:
Nol gera el sorze mio zerman Matio.»
― «Zerman? faaa... trentasete.» ― «Co bel ambo!»
― «E dopo? ― «E intanto che vegniva el meco,
Me so 'svegiada in brasso a mio mario...»
― «Beco? faaa... diese.» ― «Co bel terno seco!...»
