XIV.
EL TARAMOTO
― «(Trrr...)» ― «Gesumaria, ciò Checo?» ― «Ah!» ― «El taramoto!»
― «Da seno?» ― «Senti:» ― «(Trrr...)» ― «Ah, stavolta andemo!
Ciao, sa, Catina!» ― «Presto, zo, scampemo...»
― «Ma indove?» ― «In Campo...» ― «Varda: el muro roto...»
― «Màlgari, 'Gnese, Zanze!» «...E mi? de boto,
Me spaco el naso!...» ― «Mi son quà che tremo!...»
― «...E mio mario che xe cascà col remo...
Per fortuna che mi gera de soto!...»
― «Vardè el Campielo, tuto pien de zente!...»
― «Gastu sentio co bota?» ― «El tasa el tasa...»
― «Co paura! So 'nua, ma no fa gnente!...»
«Ciò, Pina, indove xela la mia Rossa?»
«Son quà, Papà, col mio moroso in casa...»
― »Sta atenta ben, sa? a la seconda scossa!...»
