IV.
IN MORTE
(lugio 1901)
DIALOGO FRA DO POPOLANI
― «Sa: xe morto Selvatico!...» ― «Va via!»
― «Va via? magari pur no fusse vero;
Ma pur tropo...» «Ah, chi dito gavaria:
Ancùo san, e doman in çimitero...»
― «Povarin, cussì bon, cussì sinçiero,
Senza grandezze...» «E sì che'l podaria
Averghene avue lù, nobile vero,
Con quel inzegno e quela fantasia!»
« ― Venezia pianze come 'na gran mama
Che ghe sia morto el so più caro fio,
E, pianzendo, per nome la lo ciama...»
«Co mor, corpo de bio, sta brava zente,
Mi, me la ciaparave anca co 'Dio
Che el fa le robe come fusse gnente!...»
