XXXVI.
L'ESTRAZION DE' LOTO
(In Piazza Sa' Marco)
― «Eco che i cava...» ― «13» ― «Lo gogio?»
― «(Punto de Giuda), gnente ciò..» ― «In malora!»
«43.» ― «Ghe xelo?» ― «No, gnancora.»
«Ostia, no vogio più zogar, no vogio!...»
― «15.» ― «Ohooo, e uno.» ― «Gò za el sangue in bogio!
«Ssst...» - «Sete?» - «No.» ― «Si.» - «77» ― «Ancora,
Le gambe de le done!...» ― «Se vien fora
El ventinove, onzèmo el portafogio...»
― «Xe squasi un ano che lo meto, e mai
Fora no 'l vien sto numaro d'inferno...
Bisogna propio nasser desgraziai!»
― «E anca sta volta...» ― «Vinçerà el governo
Che de speranza ingrassa i desparai!»
― «Podèmo dirlo!» ― «29» ― «Ternooo!...»
