Orsolina.
Andemo, el se destriga.
Toni.
Anca del lu! La mama t'à pur permesso de darme del ti... Dime, Orsolina, no ti me vol più ben? Cossa t'ogio fato mi?
Orsolina.
Queste xe sempiae bele e bone. Vorlo che tuto el zorno staga disendoghe: ghe vogio ben, ghe vogio ben?
Toni.
Vardè che manierasse! Lo so za che soto ghe xe qualcossa; ma corpo dela luna ghe vegnarò in ciaro de tuto. Perchè in fin dei conti no merito de esser tratà cussì; perchè ghe voleva e ghe vogio, sì, ghe vogio ancora ben e sento che la me farà disperar.
Bettina.
Mo via! Cossa gala là drento? El faria intenerir le piere e ela no se gnanca scompone!
Orsolina.
(Quasi quasi el me fa pecà, ma d'altra parte xe megio che el capissa che no podaria adatarme a viver co' lu. Oh! Se el gavesse el far de sior Ubaldo)!
