Ela xe ostinada, superba e...
Tasè un momento! Ma el cuor xe bon de tute do perchè lo so e ghe ne go avue dele prove. Pur se continuè a viver in sto modo, col'andar del tempo finirè per odiarve; e mi no vogio che mia mare e mia mugier, le do creature che go più care a sto mondo, se gabia da odiar. Dunque... la xe dura a dir... ma za cossa se ga da far?... Dunque xe megio che... se separemo.
Si commuove e così a poco a poco tanto Rosa che Emilia. Pausa.
Ve zuro che a dir sta parola sento che me se s'ciopa el cuor... perchè a pensar che podaressimo viver contenti e feliçi nel nostro picolo... e inveçe mi che son stà sempre viçin ala mia bona mama...
Le si avvicina e la accarezza; Emilia a poco a poco si avvicina a Momolo commossa.
che go volesto sempre ben, no posso proprio pensar de dover lassarla adesso che la ga più bisogno de mi... Ma ti me vorà ben istesso, mama mia, anche se no saremo in una stessa casa?
