81.
Finido de pregar, i manizava
I magi, le manere e le mastele,
E in t'un momento tuti i bo i scanava:
I da drio, dopo fata zo la pele,
Impirai in te i spei i brustolava,
Coverti ben col grasso de le buele;
I garzoni zirava i rosti; e intanto
Crise ghe li sgianzava de vin santo.
82.
Dei bo la coraela i ga sazà,
Co xe sta le cossate cusinae;
In tanti tochi el resto i ga tagià,
E i ghe n'ha fato de le altre ispeae.
Tripe, rognoni, cuor, spienza e figà
Ga servìo a le piatanze, preparae
Dai coghi, che gavea da lavorar,
Perchè Crise voleva un bel disnar.
