39.
Minerva a brazzacolo l'ha chiapà;
E la ga dito: - Achile, vià essi bon;
Dal Cielo so vegnuda in pressa qua
Per fa che no ti mazzi Agamenon.
Gera drio che scoava; e m'ha pregà,
Quasi pianzendo, de vegnir, Zunon,
Spanta morta per vualtri, povareta,
Perchè meta una bona paroleta.
40.
Capisso che l'Atride xe insolente;
Ma cossa vustu far? gabi pazienza:
Perchè quela una razza xe de zente,
Che sa de esser de una gran semenza;
Ti dighe pur quel che te vien in mente;
Ma de spada fa conto de esser senza.
Scoltime adesso, e un zorno vegnarà
Che el Cielo un premio grando te darà. -
