13.
Apena descargà l'arco d'arzento
Se ga sentìo un teribile rumor,
Che ai sassi gavaria fato spavento.
Le bestie prima el Dio col so furor
El copava, e po dopo a cento a cento
I povari soldai; e sto dolor
Per nove boni zorni el ga durà,
Chè a forza de tirar el s'ha stracà.
14.
A quel dei diese, Achile finalmente
A l'arengo ha volesto convocar
I capi e tuta quanta la so zente,
Per veder cossa se podeva far.
Chè a lu ghe lo aveva messo in mente
La Dea, che i antighi ga vossuo chiamar
Dai bianchi brazzi, insuma za Zunon,
Che dei Achei ga avudo compassion.
