AMOR! AMOR! AMOR!
Quando fra scure nuvole
Più trista par la Luna
E mi soleto in gondola
Ziro per la laguna...,
Co l'aflizion ne l'anima,
Co la tempesta in cuor,
In tanta solitudine,
Vado ciamando: ― Amor!...
Amor!... Amor!... ― Ma 'l perfido
A mi no me risponde...,
Nè trovo chi vol dirmelo
Dove colù se sconde!...
Come xe mai possibile
De viver senza Amor...,
Quando ridoto in lagreme
Me core el sangue al cuor?
L'eco lontan, che replica
El stesso mio lamento,
Me mete in corpo i grizzoli,
Me giazza de spavento!...
