COSSA M'IMPORTA A MI?...
Cossa m'importa a mi che in çielo splenda
De zorno el sol e de note le stele;
Che in tera e in mar la calma se distenda,
La calma che fa l'anime sorele?...
Cossa m'importa a mi che le putele
Perchè più no le vardo le se ofenda..,
E sia ne l'opinion de le più bele
Che de belezza mi no me n'intenda?...
Cossa m'importa a mi de tuto questo;
Creature mie, disè..., disème el vero:
Cossa m'importa a mi de tuto el resto?
Quando no trovo un cuor che sia sincero,
Amoroso, fedel, costante, onesto...
Cossa m'importa a mi del mondo intiero?
