A UNA NUVOLETA
Discorer co le nuvole
La xe un'usanza bona,
Perchè no gh'è pericolo
Che dopo se questiona!
- Terenzio
Dove vastu, nuvoleta,
Cussì sola per il cielo
Co sto fresco ventesèlo
Che le fogie fa cascar?
Dime, dime, benedeta,
Dal color de late e rosa...,
Vagabonda, vaporosa,
Dove vastu a terminar?
Quanti monti e quanti mari;
Quanti fiumi e quante tere...,
Chi sa mai, per quele sfere
Ne l'andar ti passarà!...
Ti, viagiando tanto in alto,
No ti vedi, no ti senti
Le gran piaghe, i gran tormenti
De l'intiera umanità!
