Sta pagina la xe stà trascrita, ma la gà ancora da vegner rileta.
INDOVINELO... SPIEGÀ
Mi no viagio in velocipede,
Nè co treni o co veture;
Mi no vado gnanca a pedibus....,
E pur visito pianure.
Monti, vale e gran çità....
E 'traverso i grandi oceani
Senza moverme de qua!
Go un agente çelerissimo,
Una specie de comesso....,
Che per tuti xe invisibile,
Che xe megio de mi stesso
Quando el va lontan, lontan!...
E pur lu, co tanti meriti,
No 'l ga paga o bone-man!
El xe svelto più del fulmine..,
Più del fià lu xe liziero..
E, corendo come eletrico,
El te zira el mondo intiero
E po el torna qua da mi,
Rinovando, senza ostacoli,
Sti so viagi tuti i dì!