- 4.
Sfadìga a sangue 'l povaro vilan
più d'un bò da lavoro, e 'l xe contento
s'el ga polenta tuti i dì (el formento
xe roba del paron che magna pan).
Questo nol sa ch'el sgoba come un can
per darghe 'l sorapiù, el divertimento;
la carozza; i cavài fornii d'arzento,
e velade e pelizze d'astrakan.
De la so zente invece d'aver cura,
dei so anemài, dei campi e de le case —
órbo ai progressi de l'agricoltura —
tuto lu lassa andar come a Dio piase;
el beve e 'l magna...: fina che la dura...;
fina ch'el contadin lavora e tase!
- 5.
In fra tanti paroni, ghe ne xe
de quei che trata ben e che lavora,
studia, prova, reprova... e porta fora
tut'alpiù el do per çento opur el tre.
Cò sponta l'alba i ghe porta el cafè;
la sera..., sempre in leto de bon'ora;
quei paroni no ciama la malora:
ocór agiuto?, e un cuor largo trovė.
Ma in cambio de mostrarse un omo grato
ai benefiçi e al pan assecurà,
el dipendente va imitando el gato;
o, ilúso da le nove società,
nol respéta l'acordo ch'el ga fato
e servizio e paron resta impiantà.