- 30.
El benestante, pien de bona vógia,
ga pronti çento scagni da sentarse;
scagni da sfadigoni, da comparse,
che dà molti fastidi e poca zógia.
In tante ocupazion (se no i l'imbrógia
fra imprese e società) gh'è da prestarse
tuto el zorno in favor dei altri, e darse
a medegár qualche secreta dógia
Povaru lu, se ghe vegnisse in mente
de aver, almanco, la riconossenza
del publico e 'l respeto de la zente!
I dirà: l'ambizion xe la semenza;
sarà un titolo el fruto, e çertamente.
del nostro “grazie„ el ghe ne pòl far senza.
- 31.
Sempre cussì da che mondo xe mondo
la xe stada; ma pur ghe ne xe tanti
che sa d'aver da far con dei birbanti
e le carghe soporta fin in fondo.
Lassando ciaciarár per longo e tondo,
come se i fusse sordi tuti quanti,
tranquili de cossienza i tira avanti
no badando a rivár primo o secondo.
Paste fate de miél, o çirenéi
che possedè la forza madornal
de sgobȧr disprezzando onori e schei,
mi voría farve un monumento tal,
che, al so confronto le Alpi e i Pirenei
somegiásse a un trofeo da carneval.