- 12.
Ma, framezzo ai cativi, ghe n'è tanti
che, dopo lavorà síe zorni intieri,
un dì i pol viver fora dai pensieri
senz'esser causa de dolori e pianti.
La sposa ga un bel ábito; i so guanti;
i fiói somegia a quei de siori veri;
i vestiti sarà veci o lizieri,
ma, cussì in sesto, i par novi fiamanti.
El papà tiol in brazzo el so più picolo,
a st'altro el ghe dà man; la mama al terzo:
no i ga minga paura del ridicolo!
Eco de le famegie la delizia:
lavorando de cuor, e no per scherzo,
dai più bruti difeti i se desvizia.
- 13.
El zogo e 'l vin! (lassèmo star le done,
che del mondo le xe la mégio parte)
se no i gavesse mai inventà le carte
e no fusse le ue cussì barone,
che, dopo fato el vin, le te compone
el spirito, capazze de mazzarte,
o quanto megio per l'industria e l'arte,
che ga neçessità de teste bone!
Quante desgrazie, quanto disonor
a l'omo e a le famegie sparagnà;
quante bale de manco in mezzo al cuor!
Vigliachi!; quando ben sè andài de là,
in causa de quei vizii che fa oror,
credéu con vu sia tuto terminà?