- 8.
Oh! in çità xe una vita difarente.
De matina al cafè; la passegiata;
qualche afareto, e po' un'improvisata
a quei del cuor che no ve sa presente.
Un'altra ziradína; e, finalmente,
vien l'ora del disnár: l'ora beata.
A tóla no s'invecia cò se cata
un bon pranzeto e la so sposa arente!
Dopo, col Moka e un sorso de Cognac,
el bigliardo o 'l terzilio al Club in quatro,
sin che vien l'ora de ficarse in leto.
Opur, se dà el capriçio, súso el frak,
la ciave del palcheto, e via: a teatro.....;
quel de çità xe un viver benedeto.
- 9.
Quante bele signore, in palco, e abasso
quante mezze velàe! Xelo un lavoro
de telegrafo otico!!..... Lindoro
canta la serenata. Eco ch'el basso
côre a vardar cossa che xe quel ciasso,
e intanto la Rosina al so tesoro
la ghe çivéta; e Figaro, co' l'oro,
de Bartolo s'impegna a torse spasso.
Ma chi mai bada a l'ópara e ai cantanti?:
a teatro se fa petegolezzi;
se visita le dame; se questiona;
se stima le toalet, l'oro, i diamanti,
opur se zoga in camarin de bezzi...;
oh!, per zogar qualunque ora xe bona.